Արձախի հանձնաժողովըի հայտարարում է
Արևմտյան Հայաստանի Հանրապետության Ազգային ժողովի Արձախի հանձնաժողովը խոր մտահոգություն է հայտնում Սիրիայի հյուսիս-արևելքում՝ Ջեզիրեի տարածաշրջանում տեղի ունեցող զարգացումների կապակցությամբ, որոնք կարող են հանգեցնել նոր մարդասիրական ճգնաժամի և խաղաղ բնակչության զանգվածային տեղահանման։
Հանձնաժողովը կոչ է անում հակամարտող բոլոր կողմերին ցուցաբերել առավելագույն զսպվածություն և ողջախոհություն, ձեռնպահ մնալ ռազմական գործողություններից, հարգել միջազգային մարդասիրական իրավունքի նորմերը և ապահովել խաղաղ բնակչության կյանքի, արժանապատվության ու անվտանգության պաշտպանությունը։
Ջեզիրեի տարածաշրջանը պատմականորեն բնակեցված է նաև Հայոց ցեղասպանությունից (1915) փրկվածների ժառանգներով, որոնց համար Սիրիան դարձել է երկրորդ հայրենիք։ Տարածաշրջանում խաղաղության խաթարումը և անվտանգության անկումը վտանգում են ոչ միայն ներկայիս բնակչությանը, այլև պատմականորեն ձևավորված համայնքների գոյությունն ու մշակութային ժառանգությունը։
Հանձնաժողովը ընդգծում է, որ անցյալի ողբերգությունների անպատժելիությունը հաճախ ստեղծել է նոր հումանիտար աղետների նախադրյալներ։ Այդ պատճառով միջազգային հանրության պատասխանատվությունն է կանխել նոր բռնություններն ու ապահովել քաղաքացիական բնակչության պաշտպանությունը՝ անկախ նրանց ազգային կամ կրոնական պատկանելիությունից։
Միջազգային պրակտիկան ցույց է տալիս, որ հումանիտար աղետների սպառնալիքի պայմաններում միջազգային հանրությունը բազմիցս միջամտել է՝ քաղաքացիական բնակչության և խոցելի համայնքների պաշտպանությունն ապահովելու նպատակով։ Ջեզիրեում առկա վտանգները պահանջում են նույնքան զգոն և կանխարգելիչ մոտեցում։
Արևմտյան Հայաստանի Հանրապետության Ազգային ժողովի Արձախի հանձնաժողովը վերահաստատում է իր հանձնառությունը՝ պաշտպանելու խաղաղության, մարդու հիմնարար իրավունքների և պատմական արդարության սկզբունքները։
Комментарии
Отправить комментарий